SINT NYK - As jo by it 50 jier bestean en alle jierren dêrfoar in moaie toanielproduksje op de planken sette kinne, meie jo as toanielferiening yn dizze tiid wol bliid wêze. Net allinnich om reden fan in feestje, mar ek omdat it toanielspyljen yn jo doarp blykber in grutte oanlûkingskrêft hat. Yn Sint Nyk is dat sa. It bestjoer hoeft net in soad muoite te dwaan om foar harren jierlikse produksje meiwurkers te finen. It entûsjasme is tige grut en yn Sint Nyk is in protte jeugd dy ’t ek graach toanielspylje wol.
Dat entûsjasme wie by de fraach fan it bestjoer wa ’t meidwaan woe oan de jubileum-útfiering net oars. Mar wêr fine jo no in stik, wêryn safolle minsken meidwaan kinne. Dat wie lestich en dêrom wie it in skoftke knap harsenskrabjen foar de ûnderwilens oanstelde jubileumkommisje. Mar hja lieten harren net kenne. Uteinlik, troch in ynfallend idee únder in autoritsje, wie men fan betinken dat ‘r sels wat skreaun wurde soe. Wurk oan ‘e winkel dus. It moast in produksje wurde, weryn fragminten fan toanielstikken fan de ôfrûne jierren te sjen wêze soenen. Sa betocht, sa sein, sa dien….. Mar it die bliken dat it noch in hiel och heden wêze soe. En Corona wie d’r ek noch!!
Mar, de kommisjeleden lieten harren net ferkatse en setten troch. De fragminten waarden fûn, it mooglike probleem mei de groepsgrutte fanwege Corona waard ek oplost. It publyk koe ferdield wurde yn trije groepen en dan spylje op trije lokaasjes. Dus, d’r koe útein set wurde mei de repetysjes. Earst yn lytse groepkes it eigen stik en dêrnei kaam it byinoar. O ja, omdat yn in soad earder spile toanielstikken gebrûk makke wie fan koarsjongers, koenen dy fansels ek net ûntbrekke by dit jubileum. De titel fan dizze jubileumproduksje is: “Jubeleving”. De fragminten binne moaie, ôfrûne stikken wurden en humor fiert de boppetoan. It koar hat in prachtige seleksje makke fan lieten dy ’t ea song binne yn toanielstikken.
Roel van Nijen
Dizze “Jubeleving” is noch te sjen op freed 8 april en sneon 9 april. Begjin: 19.30 oere, seal iepen 19.00 oere. En ek noch op sneintemiddei 10 april, begjin 14.30 oere, seal iepen 14.00 oere. Kaarten kinne on-line besteld wurde op: www.toanielstnyk.nl en binne te keap by drogist De Magneet yn Sint Nyk. De kaarten binne € 12,50 it stik.
(foto's De Zakenman)
